Satua Bali Basang Gede

 Ada koné tuturan satua, I Radén Mantri Koripan luas maboros ka tengah alasé linggah. Disubané ida neked di tengah alasé, lacur pesan ida tusing maan buron napi. Sawiréh guminé panes pesan, Radén Mantri ngrasayang bedak, paling koné ida ngalihin yéh ajeng. Disubané makelo ida ngalih yéh, laut ida nyingakin pancoran sané yéhné ening pesan. Duaning suba kaliwat bedak, nénten malih ida mapineh laut nyérét yéh saking pancoran punika. Tusing krungu ida ada lelipi anyud uling pancorané tur macelep ka basangné.

Tusing karasa jani di Puri Koripan, Radén Mantri nyakitang basang, makelo-kelo sing karasa basang ida ngancan ngedénan kanti tusing nyidang majalan cara anak séda, nanging penyingakané dogén ané kijap-kijap. Makelo-kelo jani i lelipi memanakan di basang idané. Akéh suba balian ané nagih ngubadin, nanging tusing sida baan nambanin I Radén Mantri. Ningeh unduké punika, Ida Sang Prabu Koripan ngandika pacang ngutang okané ka alasé tur lakar kagaénang puri alit miwah kadampingin sareng parekan miwah sarwa brana.

Kacaritayang jani, suba koné makutang I Mantri di tengah alasé. Di subané limang dina Ida ditu, saka besik panjak ida ngalahin ida di tengah alasé. Dadiné padidian ida tusing ngajeng apa-apa, kisah-kisah di pasirepan.

Kacaritayang rainipun, Radén Galuh risedek ida misbisin kapas ri kala Tumpek Wayang, lantas ida nyingakin uled di tengah kapasé. Uledé ento lantas kaubuh kaapikin pesan sakadi miara oka. Uledé ento sai-sai kabaang getih céléng miwah getih sampi, muah getih kebo. Makelo-kelo sagét uledé ento suba mokoh, mireng Ida Sang Prabu tekén unduk okané ento, lantas kapangandika apang Radén Galuh ngutang uledé ento. Ningehang raos ajin ida, Radén Galuh mapamit saha matur,

"Inggih aji, yéning aji ngandikayang titiang mangda ngutang uledé puniki, becikan titiang sareng mangda makutang".

Duaning kéto aturné Galuh, ngaénang ajiné gedég pesan, lantas kangandikayang mangda ngutang I Galuh ka alasé bareng ajak uledé ento.

Kalunta-lunta makelo jani pajalan I Galuhé, tan karasa I Galuh jani neked di tongosné I Mantri Koripan. I Galuh sebet pesan nyingakin kawéntenan rakan ida I Mantri Koripan sané tusing nyidang makitipan, basangné gedé pesan. Kangen bayuné I Galuh. Nyingak unduké ento, i uled lantas matur tekén I Galuh,

"Inggih ratu Radén Galuh, rarisang sampun bor-bor titiang, aon titiangé anggén tamba I Radén Mantri, janten ida pacang kénak".

Gelisang satua, lantas uledé ento kabor-bor tekén I Galuh, aoné kaadukin yéh lantas kaaturin I Mantri. Mara I Mantri nginum yéh lolohé ento, prajani pesu koné bangkén lelipiné kayang panak-panakné. Ditu lantas I Mantri katongosin olih I Galuh kanti kénak jati mula.

Kacaritayang jani Sang Prabu Koripan mireng tekén okané suba kénak, lantas kapangandikayang mangda panjak idané mendak ka alasé. I Radén Mantri kairing olih I Radén Galuh mawali ka Puri Koripan kasanggra olih ajin biang idané. Ento mawinan kayang jani anaké tusing dadi nyérét yéh pancoran, wiadin misbisin kapas ri kala Tumpek Wayang.

Pustaka :

Kontributor Wikipedia. “Basang Gedé”. Wikipedia: Ensiklopedia Bebas. Wikipedia, Ensiklopedia Bebas, 22 Agustus 2021. Web. 1 Maret 2022.

"Katalog Buku Salinan Lontar dengan Sistem Digital UPTD Gedong Kertya Singaraja Klasifikasi 6 (Weda) Tahun 2017". bulelengkab.go.id.