Satua Bali Lutung Teken Macan

Lutung Teken Macan

Kacerita jani I Lutung masusupan ngungsi alas. Tan dumadé tepukina I Macan sedekan medem di batan kayuné. I Macan matakon, “ih, iba Lutung lakar kija?”

I Lutung masaut getar, “aduh sedeng melaha pesan, waké mula nyadia ngalih iba. Jalan iba luas ka pasisi, ajaka mapatung. Waké suba mapenga bé penyu.”

I Macan daat lega ningeh, laut masaut age, “nah lamun kéto jalan énggalang kema. Uli tuni waké dini nganti tetadahan. Jani sedeng melaha iba teka ngajakin mapatung.”

Tan critayang di jalan sagét suba teked di pasisi. Tepukina penyu mokoh nyegagag nengkayak. I macan jibrag-jibrag sawiréh kendelné tan sipi.

I Macan mamunyi, “ih Lutung jani kemu iba ngalih api. Waké dini nampah mukang-mukang. Ajaka anggon saté!” I Lutung nyrucut tan patolihan nyujur padukuhan ngalih api. Critayang ajaka dadua suba sayaga nyaté. I Macan manggang saté, I Lutung ané ngilihin. Mara lebeng a katih abana menék ka punyan kayuné baan I Lutung.

I Macan matakon, “dadi aba iba menék?” I Lutung masaut banggras, “badah, sajan iba buron belog, yan dini betén ejang sinah telah amah semut, legu, jangkrik muah capung.” I Macan siep sing mamunyi, itep manggang saté. Peluhné mesuab pesu. Sabilang lebeng a katih penékanga ka kayuné.

Suba suud nyaté, I Macan alon mamunyi, “ih Lutung, sawiréh suba suba suud nyaté, nah kemu énggalang tuunang saténé! Jalan dini amah!”

I Lutung gancang nyautin, “nah jani waké ngalih menék.” I Lutung nyrucut menék ka tongos saténé. Teked ba duur I Lutung laut negak masila. Tegakné seken pesan, sambilanga nganyuknyuk ngéwérin I Macan. Saténé kaanggar, kaaud lantas canggola. Katikné entunganga, sarwi mamunyi, ih Macan, kanggoang iba ngamah katikné dogén.”

I Macan nuléngék mabalih I Lutung ngamah saté. I Macan gelek-gelek, poosné ngetél ngadek bon saténé lalah manis.

Suba telah saténé kateda, basangné I Lutung malenting betekan, uabné ngencur matanné ngriyep lantas pules leplep.

I Macan ngelur magruéng. I Lutung tangkejut, limanné kepar engsap magisian. I Lutung ulung maglebug nungkruk. Ditu I Macan sahasa ngéncolang nyagrep saha ngelur, “ih iba Lutung, jani tusing buungan iba lakar mati tadah waké, lakar jambal waké nganteg tain ibané. Getih ibané lakar cérét waké. Elasang keneh ibané mati.”

I Lutung makenyir lantas masaut getar, “ih iba Macan, saking saja keneh ibané lakar ngamatiang waké? Sing saja lakar sida baan iba ngepet urip wakéné. Iba nawang kranané Sang Rawana mati ané malu? Leluhur wakéné ané ngrebut ngamatiang. Kayang jani kawisésanné ada di awaké. Yan iba edot mancut urip wakéné, jani waké ngorahin iba. Mula dini di muncuk ikuh tongos pramajiwan wakéné. Yan suba pegat baan iba nyaplok pedas waké mati.”

Mara kéto munyinné I Lutung, ngénggalang I Macan nyaplok muncuk ikuhné. I Lutung ngénggalang makecos menék nyrigjig ka punyan kayuné, sambilanga kedék ingkel. I Macan jengah erang kalahang lutung bengil. Basangné kebus matanné barak, lantas masusupan ka tengah alasé.