Satua Bali I Basong Belang Kalikukun

Katuturan satua, wénten jadma pagunungan maparab Pan Pangkung. Ipun polih nuduk Basong Cenik, mabulu putih tultul kuning sakadi rupan kulit kayu kalikukun. Matan ipun linglang, putih abesik miwah kuning abesik. Tlapakan batis ipun makapatpat madaging usehan. Lantes Basong punika kaadanin Basong Belang Kalikukun olih Pan Pangkung.

Gelisang satua, Basong puniki sampun gedé miwah galak pesan ring saluiring buron sané wénten ring alasé. Punika mawinan sai-sai Basong punika ajaka maboros ka tengah alasé. Buina Basong punika ngresepang munyi napi sané kapituduhang olih Pamekelné. Sedek dina semengan, wénten pisaga teka ka pondok Pan Pangkung pacang ngidih tulungan tundén ngatehin luas ka alasé ngalih buah tingkih. Pan Pangkung sumanggup ngatehin, raris makakalih punika luas ka alasé.

Basong sané madan I Belang, sagét nutugin sang makakalih punika uli duri. Disubané neked ring tengah alasé, raris makakalih punika nudukin buah tingkih. Ri sedek iteh nudukin buah tingkih sagét ada macan gereng-gereng pacang nyagrepin Pan Pangkung miwah pisagané raris teka I Basong nyagjagin, nyagrepin miwah ngelut I Macan ngantos magulet. Pan Pangkung ngejer ngetor takut nepukin unduké punika miwah tusing bani nulungin I Belang raris laib labuh sang makakalih nyorjor pondok ipuné. Disubané neked di pondokné, Pan Pangkung mamanah yéning I Belang suba mati baan I Macan. Kacarita I Macan kari magulet sareng I Belang durung wénten sané kalah sami pada mesuang kasaktian. Ri sedek wénten selah, I Belang ngutgut basang I Macan ngantos paling. Buina I Macan sakadi kabungkam bungut ipun tusing nyidayang manganga punika taler makasami kukun ipuné nénten nyidayang kebat. Kaliwat tekek gelutan I Belang ngawinang I Macan lemet tusing ngelah bayu.

Sawiréh sampun lemet I Macan ngraris kagugut baong ipuné baan I Belang. Irika lantes I Belang mamunyi, Né suba ia I Rarik, magoda buka kai ngwalesan dosan ibané tekén kai né malu. Wau asapunika munyin I Belang, ngraris I Macan ngeling tur ngidih urip sambilanga nyembah-nyembah I Belang. Mamunyi lantes I Macan, Saluiring katurunan titiang nénten pacang purun ring Basong Belang Kalikukun. Sawiréh asapunika munyin I Macan, raris lébina baan I Belang. I Macan raris magedi ninggalin I Belang ka tengah alasé.

I Belang raris majalan mulih ka pondok pamekelné. Disubané neked ring pondok, makesiab Pan Pangkung nepukin I Belang sawiréh kari maurip. Bungut I Belang nu magetih-getih ngantos ring bulun ipuné. Abedik tusing manyet yan basong ipuné kari maurip, sawiréh sampun kagulet baan I Macan. Punika mawinan Pan Pangkung wau uning ring kaduegan Basong ipuné raris ipun sayang pisan ring Basong punika.

Pustaka :

Kontributor Wikipedia. “I Basong Belang Kalikukun”. Wikipedia: Ensiklopedia Bebas. Wikipedia, Ensiklopedia Bebas, 22 Agustus 2021. Web. 1 Maret 2022.

"Katalog Buku Salinan Lontar dengan Sistem Digital UPTD Gedong Kertya Singaraja Klasifikasi 6 (Weda) Tahun 2017". bulelengkab.go.id.